Ózbekstan Respublikası Ministrler Kabinetiniń 2020-jıl 11-noyabrdegi 715-sanlı qararı menen tastıyıqlanǵan “Professional bilimlendiriw mekemelerine oqıwǵa qabıllaw tártibi haqqında nızam”ınıń 2-qosımshasında “Professional bilimlendiriw mekemelerine abiturientlerdi test sınawları arqalı qabıllaw tártibi” belgilep berilgen.

Usı hújjette professional bilimlendiriw mekemelerinde abiturientlerdiń múrájatın kórip shıǵıw ushın appellyaciya komissiyası shólkemlestiriletuǵınlıǵı belgilengen.  

Appellyaciya komissiyası quramına professional bilimlendiriw mekemesi qabıllaw komissiyasınıń aǵzaları hám pánler boyınsha ekspertler kirgiziledi.

Appellyaciya komissiyası quramı professional bilimlendiriw mekemesi direktorınıń buyrıǵı menen tastıyıqlanadı. Appellyaciya komissiyasınıń baslıǵı professional bilimlendiriw mekemesiniń direktorı esaplanadı.

Test sınawları nátiyjesinen narazı bolǵan abiturient yaki onıń ata-anası, sonday-aq olardıń ornın basıwshılar test sınawları tolıq juwmaqlanıp, tańlaw nátiyjesi járiyalanǵannan soń eki kún dawamında professional bilimlendiriw mekemesinde shólkemlestirilgen appellyaciya komissiyasına jazba yaki elektron túrde appellyaciya shaǵımın beriw huqıqına iye.

Bunda abiturientke appellyaciya shaǵımı qabıl etilgenligi haqqında xabarnama beriledi.

Appellyaciya shaǵımın bergen abiturient xabarnamada belgilengen kúni óziniń pasportı (tuwılǵanlıq haqqındaǵı gúwalıq) hám abiturient ruxsatnaması menen keliwi shárt.

Appellyaciya shaǵımı eki jumıs kúni ishinde appellyaciya komissiyası tárepinen abiturienttiń jazba juwapları tiykarında kórip shıǵıladı.

Mámleketlik test orayı xabar xızmeti