Ózbekstan Respublikası Ministrler Kabinetiniń “Ulıwma bilim beriw pánlerin biliw dárejesin bahalawdıń milliy test sistemasın engiziw haqqında” 2020-jıl 12-oktyabrdaǵı 646-san qararına tiykarlanıp 2021/2022 oqıw jılı qabıllawınan baslap tiyisli ulıwma bilim beriw pánin (shet tili bunnan tısqarı) biliw dárejesi haqqında mámleketlik úlgisindegi sertifikatqa iye bolǵan abiturientke sertifikattaǵı ózlestiriw procentine sáykes túrde joqarı bilimlendiriw mákemesi bakalavriatına oqıwǵa qabıllaw boyınsha test sınaqlarında bul pánnen belgilengen maksimal balǵa salıstırmalı qatlamlastırılǵan (proporcional) ball beriw tártibi engizilgen.
Házirde Bilim hám mamanlıqlardı bahalaw agentligi tárepinen ulıwma bilim beriw pánlerin biliw dárejesin bahalawdıń milliy test sisteması tiykarında 9 pánnen – ana (ózbek, qaraqalpaq, rus) tili hám ádebiyat, matematika, fizika, ximiya, biologiya, tariyx hám geografiya pánlerinen milliy sertifikat imtihanların ótkerilip kelinbekte. Usı imtixanlarda belgilengen talaptı orınlaǵan talabanlarǵa A+, A, B+, B, C+, C dárejedegi sertifikat beriledi.
Bunda:
A+, A dárejeli sertifikat alǵan abiturientlerge joqarı bilimlendiriw mákemesi bakalavriatına oqıwǵa qabıllaw boyınsha test sınaqlarında bul pánnen belgilengen maksimal ball beriledi;
B+, B, C+, C, dárejeli sertifikat alǵan abiturientlerge sáykes túrde sertifikattagı ulıwma balǵa salıstırmalı procent tiykarında joqarı bilimlendiriw mákemesi bakalavriatına oqıwǵa qabıllaw boyınsha test sınaqlarında bul pánnen belgilengen maksimal ballǵa salıstırmalı qatlamalastırılǵan (proporcional) ball beriledi.
Milliy sertifikatqa iye bolǵan abiturientke tiyisli májbúriy pánler boyınsha belgilengen eń joqarı ball beriledi.
Sonıń menen birge, Joqarı bilimlendiriw, ilim hám innovaciyalar ministrligi tárepinen joqarı bilimlendiriw mákemesi bakalavriatına oqıwǵa qabıllawda test sınaǵı ótkeriletuǵın pánler jıynaǵı, test tapsırmaları sanı hám bahalaw ólshemleri tastıyıqlanǵan bolıp, bul pánler jıynaǵı eki bólimnen: birinshi bólim barlıq test tapsırıwshılar ushın májbúriy bolǵan ana tili (ózbek, qaraqalpaq, rus), matematika, Ózbekstan tariyxı pánleri, ekinshi bólim bakalavriat tálim baǵdarına sáykes eki pánnen ibarat boladı. Sol orında májbúriy pánler blogındaǵı ana tili páni boyınsha test tapsırmaları tálim tiline sáykes túrde úsh tilde – ózbek tili, qaraqalpaq tili hám rus tili boyınsha qáliplestiriliwin maǵlıwmat retinde keltirip ótiw kerek.
Milliy sertifikat imtixanlarında da ózbek tili hám ádebiyat, qaraqalpaq tili hám ádebiyat, rus tili hám ádebiyat pánlerinen test tapsırmaları bólek-bólek qáliplestiriledi hám hárbir pán boyınsha sertifikat beriledi. Bul pánlerden tiyisli dárejedegi sertifikatqa iye bolǵan abiturientlerge joqarı bilimlendiriw mákemeleri bakalavriatına oqıwǵa qabıllawda tálim tiline sáykes túrde májbúriy pánnen maksimal ball, qánigelik páninen maksimal ball yamasa maksimal ballǵa salıstırmalı qatlamlastırılǵan (proporcional) ball beriledi.
