Oxirgi kunlarda ayrim manbalarda abituriyentlarni ro‘yxatdan o‘tkazish joylarida navbatlar yuzaga kelganligi, bunga Davlat test markazining dasturi yaxshi ishlamayotganligi sabab sifatida keltirilgan ma'lumotlar paydo bo‘ldi.

Aslida Davlat test markazining dasturi har kuni uzluksiz 24 soat ishlamoqda. Masalan, 8 iyul kuni bir kunda 81 000 nafardan ortiq abituriyent ro‘yxatdan o‘tkazildi. Bu o‘tgan kunlar orasida rekord ko‘satkichdir.

Vaholanki, joriy yil 15-30 iyun kunlari 15 kunda jami 63 ming abituriyent ro‘yxatdan o‘tgan, xolos. Bu holat ham abituriyentlarimizning 15 kun ichida o‘zlari xohlagan joyda navbatsiz ro‘yxatdan o‘tish imkoniyatidan foydalanmaganligini, faol bo‘lmaganligini bildiradi.

Oldingi yillardagi qabul jarayonlarida eng ko‘pi bilan bir kunda 65 mingga yaqin abituriyent oliy ta'lim muassasalariga hujjat topshirgan bo‘lsa, bu yil bir kunda 100 mingga yaqin abituriyentni ro‘yxatdan o‘tkazish imkoniyatiga egamiz.

Shuni ham alohida ta'kidlash kerakki, bir nafar abituriyentni ro‘yxatdan o‘tkazish uchun Davlat test markazi dasturi bir vaqtning o‘zida Ichki ishlar vazirligining, Bank tizimining elektron dasturlari, shuningdek, imtiyoz berish vakolati bor bo‘lgan 15 ta vazirlik va tashkilotlarning elektron tizimlariga bog‘lanadi. Bunday katta hajmdagi axborotlar bazasi bilan ishlash tabiiy ravishda tezlikning pasayishiga olib keladi.

Bugungi kunda 290 ta ro‘yxatdan o‘tish joylarida 4000 dan ortiq operatorlar abituriyentlarni ro‘yxatdan o‘tkazmoqda. Bu joylardagi ro‘yxatdan o‘tish jarayonlarining tahliliga ko‘ra kunning birinchi yarmida ro‘yxatdan o‘tadiganlar sonining keskin oshib borayotganligini, kunning ikkinchi yarmida esa, ro‘yxatdan o‘tish uchun murojaat qilayotganlar soni kam ekanligini kuzatish mumkin. 

Kunlik ko‘rsatkichlar tahliliga qaraganda abituriyentlar kunning birinchi yarmida to‘lovni amalga oshirgan bo‘lsa, kunning ikkinchi yarmida qisqa vaqt ichida ro‘yxatdan o‘tkazilgan.

Ayni paytda Axborot texnologiyalari va kommunikatsiyalarini rivojlantirish vazirligi, Oliy va o‘rta maxsus ta'lim vazirligi, Davlat test markazi hamkorligida ro‘yxatdan o‘tish joylarida navbat yuzaga kelmasligi uchun barcha zarur choralar ko‘rildi. Jumladan, tezlik oshirildi, qabul komissiyalari ish soatlari uzaytirildi, mavjud liniyalarga qo‘shimcha ravishda korporativ tarmoq liniyalari qo‘shildi. Bular qolgan kunlarda abituriyentlarning qisqa vaqt ichida ro‘yxatdan o‘tishlarini ta'minlashga xizmat qiladi.

Davlat test markazi