Mamlakat rahbari tashabbusi bilan 2018 yilda oliy taʼlim muassasalariga oʻqishga kirish test sinovlari yangi talablar asosida adolatli, shaffof, xolis va ochiq tartibda oʻtkazildi. Ushbu oʻzgarishlar abituriyentlar, ularning ota-onalari va keng jamoatchilik tomonidan yaxshi qabul qilindi.
2019/2020 oʻquv yili qabulida ham 2018 yildagi tajribani ijobiy davom ettirgan holda test sinovlari jarayonida yoshlar uchun qoʻshimcha imkoniyatlar va qulayliklar yaratish maqsadida qaror loyihasida takliflar taqdim etilmoqda.
Birinchidan, abituriyentlar va ularning ota-onalari tomonidan ortiqcha ovoragarchiliklar va xarajatlarni oldini olish maqsadida ularning yashab turgan manzilida Davlat xizmatlari markazlari orqali roʻyxatga olish, abituriyent tomonidan tanlanayotgan taʼlim muassasasining joylashgan hududidan qatʼiy nazar oʻzi yashab turgan hududda test sinovlarida ishtirok etishi qaror loyihasida taklif etilmoqda.
Ikkinchidan, abituriyentlarning oʻqishga kirish imkoniyatini yanada oshirish maqsadida ularga bir vaqtning oʻzida uchta bakalavriat taʼlim yoʻnalishini tanlash huquqi berilmoqda.
Abituriyentlarga yanada keng imkoniyat yaratish uchun amal qilish muddati uch yil boʻlgan sertifikat beriladi. Sertifikatdan ular uch yil davomida oliy taʼlim muassasalariga oʻqishga kirish uchun foydalanishi mumkin boʻladi.
Uchinchidan, joriy yilda maktab, litsey va kollejlarni yakunlagan bituruvchilar uchun test sinovlari mutlaqo bepul, hech qanday toʻlovlarsiz oʻtkazilish tartibi saqlanib qolinmoqda. Shu bilan birga, oʻtgan yil va undan oldingi davrda oʻqishni tugatgan abituriyentlar test sinovlarida ishtirok etishi uchun eng kam ish haqining bir barobari miqdorida toʻlovni amalga oshirish tartibi taklif qilinmoqda.
Abituriyentlardan tushgan toʻlovlar test sinovlarini yanada sifatli va qulay sharoitlarda tashkil etish bilan bogʻliq xarajatlarni moliyaviy taʼminlashga yoʻnaltirilishi rejalashtirilgan. Ushbu mablagʻlar binolarning ijara toʻloviga, katta quvvatli konditsionerlar, shaxsni aniqlash va kuzatish kamerasi, ota-onalar uchun monitorlar bilan jihozlashga hamda abituriyentlarni ichimlik suvi va ruchka bilan taʼminlashga yoʻnaltiriladi.
Shu bilan birga, test sinovlarini tashkil etish juda katta qoʻshimcha moliyaviy mablagʻlarni talab etadi
va abituriyentlardan tushadigan toʻlovlar mavjud xarajatlarni toʻliq qoplash uchun yetarli deb boʻlmaydi. Ular jumlasiga, toʻrtmingdan ortiq guruh nazoratchilariga toʻlanadigan ish haqi, ularga tashkil etiladigan tushlik, test materiallarini sifatli tayyorlash, oʻz vaqtida belgilangan joylarga yetkazib berish, olib kelish, saqlash va shu kabilar kiradi.
Test sinovlariga toʻlovni joriy etish taklifi amalda tayyorgarliksiz kelayotgan, bilimsiz va gʻarazli niyatli abituriyentlar sonini va test sinovlari jarayonida oʻzgadan yordam olish yoki yordam berish holatlarini kamayishiga olib keladi. Ushbu toʻlovlar xorijiy mamlakatlarning taʼlim muassasalariga kirish bilan bogʻliq boʻlgan test sinovlarida ham joriy etilgan.
