2021-jıl 2-dekabr kúni Mámleketlik test orayında «Ashıq esikler kúni» shólkemlestirildi, bunda Yunusobod rayonındaǵı 70-sanlı ulıwma bilim beriw mektebi hám Tashkent informaciyalıq texnologiyaları universiteti akademiyalıq liceyiniń pitkeriwshileri hám ǵalaba xabar quralları wákilleri qatnastı.
Ilaj Mámleketlik test orayı direktorı Karimov Madjit Malikovichtıń kiris sózi menen ashıldı hám qatnasıwshılar baǵdarlama menen tanıstırıldı.
Ilajdan aldın Prezidentimizdiń tarawǵa tiyisli qararları, pármanları, «Jaslardı qollap-quwatlaw hám xalıqtıń salamatlıǵın bekkemlew jılı» Mámleketlik baǵdarlamasınan kelip shıqqan halda kiriw test sınaqlarına tiyisli eń aqırǵı jańalıqlar, kútilip atırǵan ózgerisler, test sınaǵı processlerin ápiwayılastırıw, test tapsırıwshılar ushın jánede keńirek imkániyat, qolaylıqlarǵa tiykarlanǵan halda sharayatlar jaratıw, logikalıq pikirlewge baǵdarlanǵan test tapsırmalarınan keńnen paydalanıw, ulıwma bilim beriw pánlerinen milliy test sisteması, sonday-aq, Mámleketlik test orayı jumısların tártipke salıwshı jańa normativ-huqıqıy hújjetler, qararlar joybarları, mazmun-mánisi boyınsha keń maǵlıwmatlar berildi.
Bunnan soń jaslar turaqlı arnawlı, jabıq rejimdegi imaratta jumıs alıp barıwshı basqarma hám bólimler jumısları menen tanısıw, processti óz kózleri menen kóriw ushın mirát etildi. «Ashıq esikler kúni»ne kelgenler test sınaqların shólkemlestiriw, tayarlıq kóriw, jumıslardı onlayn formada jolǵa qoyıw, test tapsırmaların dúziw, generaciyalaw, kitaplardı basıp shıǵarıw hám mánzilleri boyınsha jiberiw, qabıl qılıw hám Mámleketlik test orayına alıp kelingen juwaplar betleri tiykarında nátiyjelerdi esaplaw processleri menen jaqınnan tanıstırıldı.
Jumıslar menen tanısıw juwmaqlanǵannan soń, pitkeriwshi jaslardı test sınaǵı processi menen jaqınnan tanıstırıw, kónlikpe payda etiw maqsetinde olar qatnasında májbúriy pánlerden test sınaǵı ótkerildi.
Ótkerilgen ilaj qatnasıwshılarda úlken qızıǵıwshılıq oyattı. Pitkeriwshiler hám jurnalistlerdi qızıqtırǵan barlıq sorawlarǵa tolıq juwap berildi.
Mámleketlik test orayınıń málimleme xızmeti
