2021-2022-oqıw jılı ushın joqarı bilimlendiriw mákemeleriniń bakalavriat bilim baǵdarlarına onlayn dizimnen ótiw barısında mayıplıǵı bolǵan shaxslardıń maǵlıwmatların real waqıt rejiminde alıw ushın Mámleketlik test orayı hám Densawlıqtı saqlaw ministrligi arasında birge islesiw pitimi dúzilgen.

Pitimge muwapıq, my.dtm.uz saytı arqalı onlayn dizimnen ótiwde mayıplıǵı bolǵan abiturienttiń maǵlıwmatları Respublika medicina-sociallıq ekspertiza inspekciyasınıń bazası – “TMEK” baǵdarlamasına real waqıt rejiminde soraw jiberiw arqalı alınadı.

Házirge shekem my.dtm.uz saytı arqalı onlayn dizimnen ótken 9 mıńnan aslam mayıplıǵı bolǵan abiturientlerdiń maǵlıwmatları “TMEK” baǵdarlamasınan real waqıt rejiminde alınǵan.

Biraq ayırım mayıplıǵı bolǵan abiturientlerdiń maǵlıwmatları “TMEK” baǵdarlamasınan real waqıt rejiminde kelmey atırǵanlıǵı sebepli my.dtm.uz saytında mayıplıq boyınsha jeńillik maǵlıwmatların kirgiziw imkaniyatı jaratıldı.

Eger Siziń mayıplıq boyınsha maǵlıwmatlarıńız “Jeńillikler” bóliminde shıqpay atırǵan bolsa, usı bólimdegi “Mayıplıq jeńilligin qosıw” funkciyası arqalı tiyisli maǵlıwmatlarıńızdı kirgiziwińiz múmkin.

Eger Sizde kózi ázzilik boyınsha mayıplıq bolsa, mayıplıq maǵlıwmatların kirgiziw menen birge “Kózi ázzi” belgisin belgilewdi umıtpań.

Kirgizilgen maǵlıwmatlar Respublika medicina-sociallıq ekspertiza inspekciyasına jiberiledi hám maǵlıwmatları tastıyıqlanǵan abiturientlerdiń jeńilligi inabatqa alınadı.

Mámleketlik test orayı xabar xızmeti