6-avgust kúni Prezident Shavkat Mirziyoyev usı jılda joqarı bilimlendiriw mekemelerine qabıllawdı shólkemlestiriw hám 2020-2021-oqıw jılına tayarlıq kóriw máseleleri boyınsha jıynalıs ótkerdi.

Jıynalısta Prezident aytqanınday, sońǵı jıllarda joqarı bilimlendiriw sistemasındaǵı ózgerisler nátiyjesinde jaslar hám olardıń ata-analarında oqıwǵa isenim arttı. Hújjet tapsırıw tolıq aralıq formasında ámelge asırılǵanı xalıqqa úlken qolaylılıq jarattı.

Usı jılda mámleketimizdegi joqarı bilimlendiriw mekemeleriniń bakalavriat basqıshına 162 364, magistraturaǵa 10 425  orın ajıratılǵan. Kórsetkishler ótken jılǵıǵa qaraǵanda orınlar sanınıń keskin asırılǵanlıǵın kórsetpekte.

Bul jılı 91 mámleketlik joqarı bilimlendiriw mekemeleriniń bakalavriat bilimlendiriw baǵdarı boyınsha 1 million 484 mıń abiturient hújjet tapsırǵan bolıp, bul ótken jılǵıǵa qaraǵanda 39 procentke kóp. Bir orınǵa 10,6 talapker tuwra kelmekte.

Magistratura baǵdarında 72 bilimlendiriw dárgayına 78 mıń 720 yamasa ótken jılǵıǵa qaraǵanda 3 ese kóp hújjet tapsırılǵan. Ulıwma, qabıllaw kvotaları 2016-jılǵıǵa qaraǵanda 3 esege artqan.

Haqıyqattan da, búgingi kúnde qabıllaw test sınawları qashan, qay jerde hám qanday tártipte ótkeriliwi jámiyetshilikti de oylandırǵan. Bul, álbette, házirgi sharayatta karantin sheklewleriniń sozılıp atırǵanı menen baylanıslı bolıp, bunday sharayatta anıq maǵlıwmatlar joqlıǵı, túrli internet materiallarında hár túrli maǵlıwmatlar berilip atırǵanı da abiturientler, ata-analarına tásir etpekte.

Usılardı esapqa alıp, 6-avgust kúni ótkerilgen jıynalıs waqtında Prezident tárepinen test sınawların abiturientler hám qadaǵalawshılar ushın epidemiologiyalıq qáwipsizlikti támiyinlew imkanın beretuǵın orında ótkeriw kerek ekenligi aytıldı.

Házirgi qıyın payıtta obyektlerdiń test tapsırıwshılar ushın qáwipsizligi máselelerin úyreniw waqtında jabıq imaratlar epidemiologiyalıq talapqa juwap bermeytuǵınlıǵı, sonday-aq, sociyallıq aralıqqa ámel etilgende imtixanlar waqtı uzaqqa sozılıp ketiwi esapqa alındı.  

Usınday jaǵdaylar inabatqa alınıp, test sınawların Tashkent hám Nókis qalaları, wálayatlardıń oraylarındaǵı stadionlarda shólkemlestiriwge tapsırma berildi. Bunda imtixanlar kúnine 2 ret (hawa salqın waqıtta) ótkerilse, barlıǵın shama menen 12-14 kúnde juwmaqlaw múmkin.

Bul tapsırmalar sheńberinde tiyisli ministrlik hám organlarǵa stadionlardı test sınawlarına puqta tayarlaw, olardıń dislokaciyası boyınsha abiturientlerdi tolıq xabardar etiw boyınsha kórsetpeler berildi.

Sonıń menen birge, jıynalısta test sınawlarınıń ótkeriliw sánesin Densawlıqtı saqlaw ministrligi hám Sanitariya-epidemiologiya xızmetiniń epidemiologiyalıq jaǵday boyınsha juwmaǵınan kelip shıǵıp belgilew, xalıqtıń densawlıǵına qáwipsizlik támiyinleniwi kerek ekenligi atap ótildi.

Test sınawların ádalatlı ótkeriw ushın jaslardı artıqsha áwere etpew maqsetinde bilimlendiriw mekemelerine oqıwǵa qabıllaw boyınsha Mámleket komissiyası, hákimlikler, Ishki isler ministrligi, Milliy gvardiya, Dene tárbiya hám sport ministrligi, Mámleketlik qáwipsizlik xızmeti tárepinen zárúrli ilajlar kóriledi.

Esletip ótiw orınlı, test sınawların ótkeriw sáneleri anıq bolǵannan keyin abiturientlerge onlayn dizimnen ótiwde paydalanǵan telefon nomerine sms formasında maǵlıwmat jiberiledi.

Mámleketlik test orayı xabar xızmeti