2021-jıl 16-iyul kúni (saat 18:04 te) Joqarı hám orta arnawlı bilimlendiriw ministrligi tárepinen Respublika arnawlı komissiyası qararına muwapıq, ashıq hám jabıq aymaqlarda ǵalabaliq ilajlar ótkeriliwi múnásibeti menen akademiyalıq liceylerge dáslepki tańlaw hám de tiykarǵı imtixanlardı ótkeriw waqtı belgili bir múddetke jılıstırılǵanlıǵı hám epidemiologiyalıq jaǵdaydan kelip shıqqan halda akademiyalıq liceylerge tańlaw imtixanlarınıń ótkeriliwi usı jıldıń sentyabr ayınıń birinshi yarımına jobalastırılıp atırǵanlıǵı járiyalandı.

Biraq ayırım telegram kanallar hám sociallıq tarmaqlarda bul xabar “Kiriw imtixanları karantin sebepli sentyabr ayına qaldırılatuǵın boldı” temasında beriliwi nátiyjesinde kóplegen puqaralar xabardı tolıq oqımastan joqarı bilimlendiriw mákemelerine kiriw imtixanları sentyabr ayına qaldırıldı degen juwmaqqa kelmekte.

Sol sebepli kópshilik tárepinen Mámleketlik test orayına “Imtixanlar haqıyqattan da sentyabr ayına qaldırıldı ma?”, “Ne ushın sentyabr ayına qaldırıldı?” sıyaqlı mazmundaǵı múrájatlar kelip túspekte.

Bul boyınsha sonı málim etemiz, joqarı bilimlendiriw mákemeleriniń bakalavriat bilimlendiriw baǵdarlarına kiriw test sınaqların ótkeriw múddetleri sentyabr ayına jılıstırılǵan joq hám imtixanlardı ámeldegi nızamshılıq hújjetlerine tiykarlanıp avgust ayında ótkeriw jobalastırılǵan.

Mámleketlik test orayı xabar xızmeti