Áhmiyetli maǵlıwmatlardı jetkeriw, mashqalalardı óz waqtında kóterip shıǵıwdı ǵalaba xabar qurallarısız, blogerlersiz kóz aldımızǵa keltiriw qıyın.

Prezident múrájatnamasında ǵalaba xabar quralları mámleketimizde ámelge asırılıp atırǵan keń kólemli ózgerislerdi qalıs jarıtıp atırǵanlıǵı, orınlardaǵı bar bolǵan mashqalalarǵa mámleketlik organlar hám jámiyetshilik itibarın qaratıp, onı saplastırıwǵa barlıq dárejedegi basshılardı iytermelep atırǵanlıǵın biykarǵa atap ótpedi.

Mekeme hám shólkemler iskerliginiń ashıqlıǵın maksimal dárejede támiyinlewdi esapqa alıp, Mámleketlik test orayında 2021-yil 15-yanvar kúni ǵalaba xabar quralları, shólkemler wákilleri ushın náwbettegi press-tur shólkemlestirildi.

Press-turdıń kiris bóliminde ótken jılǵı qıyın dáwirde joqarı bilimlendiriw mekemelerine qabıllaw test sınaqları ushın tayarlıq awır ótkenligi hám test sınaqların ótkeriw barısı da ańsat bolmaǵanlıǵı atap ótildi.

Ilaj qatnasıwshılarına ótken oqıw jılında Mámleketlik test orayı tárepinen abiturientler hám de olardıń ata-anaları ushın jaratılǵan imkaniyatlar, qolaylılıqlar, test sınaǵı tártibine kirgizligen jańalıq hám ózgerisler haqqında prezentaciyalar tiykarında maǵlıwmatlar berildi.

Jurnalistler hám shólkemler wákillerinde, ásirese, jıl dawamında arnawlı jabıq rejimde isleytuǵın basqarma hám bólimler iskerligi úlken qızıǵıwshılıq oyattı. Olar máwsim dawamında orınlanatuǵın jumıslar izbe-izligi menen ashıq hám tolıq tanıstırıldı hám de qızıqtırǵan barlıq sorawlarǵa juwap berildi.

Jurnalistler qálegen temada tekstli, audio, foto, videomateriallardı sol jerdiń ózinde tayarlaw, kerekli maǵlıwmatlardı birlemshi derekten alıw imkaniyatına iye boldı.

Ilaj juwmaǵında birlemshi hám isenimli materiallardı Mámleketlik test orayınıń ózinen alıw boyınsha ǵalaba xabar quralları menen birge islesiwdi jáne de bekkemlewge, tarawǵa tiyisli jańalıqlar, ózgerisler haqqında waqtında xabardar etip barıwǵa hám zárúrli maǵlıwmatlardı  berip barıwǵa kelisip alındı.

Mámleketlik test orayı xabar xızmeti