2022-jıl 14-mart kúni “Huqıqıy axborot” telegram kanalında 2022-2023-oqıw jılınan mektep pitkeriwshileriniń shaxadatnamasındaǵı 11 jıllıq bilimlendiriwdiń sońǵı 6 jıllıq bahaları JOOna kiriwdegi balǵa qosılıwı haqqında post jariyalandı. Bunnan soń bul xabar kóplep telegram kanallarda da jariyalandı.

Usını aytıp ótiw kerek, mekteptegi bahalardı joqarı bilimlendiriw shólkemlerine kiriwde inabatqa alıw tártibi 2021-jıl 19-noyabrde belgilengen. Yaǵnıy, Ministrler Kabinetiniń 2021-jıl 19-noyabrdegi 696-sanlı qararı menen “Bilimlendiriw shólkemleriniń pitkeriwshileri bahalarınıń ortasha kórsetkishin esaplaw hám onı joqarı bilimlendiriw shólkemlerine kiriw imtixanlarında inabatqa alıw tártibi haqqında”ǵı reje tastıyıqlanǵan.

Oǵan muwapıq, tiyisli ministrlik hám shólkemler tárepinen 2022-jıl 10-iyunǵa shekem elektron platformalar iske túsiriledi hám de 2022-2023-oqıw jılı hám keyingi oqıw jılları pitkeriwshileriniń sońǵı 6 jıllıq bahaları elektron platformalarǵa kirgiziledi hám pitkeriwshiler bahalarinıń ortasha kórsetkishleri esaplap barıladı.

2022-2023-oqıw jılı pitkeriwshileriniń sońǵı 6 jıllıq bahaları hám olardıń ortasha kórsetkishleri bolsa usı oqıw jılı juwmaqlanǵannan soń, yaǵnıy, 2023-jıl jazına kelip anıq boladı.

Bunnan málim boladı, májbúriy 11 jıllıq bilimlendiriwdiń sońǵı 6 jıllıq bahaları ortasha kórsetkishin joqarı bilimlendiriw shólkemlerine kiriw imtixanlarında inabatqa alıw 2023-2024-oqıw jılı ushın qabıllaw imtixanlarınan baslap ámelge asırıladı.

Mámleketlik test orayınıń málimleme xızmeti